s’atore inglesu Christopher Lee (1922-2015) ammentadu pro s’interpretàtzione ispantosa de su majàrgiu Saruman in sos tzìnemas de Su Sennore de sos Aneddos e de Su Hobbit de Peter Jackson, pro chi at retzidu su prèmiu de Best Acting Ensemble.
De gènia nòbile, chi torrat a sos tempos de Federicu Barbarossa, Sir Christopher Frank Carandini Lee est unu de sos atores inglesos prus mannos e istimados de su mundu, connotu pro tzìnemas de sutzessu che Count Dracula, James Bond, Star Wars, Sleepy Hollow, Corpse Bride, Charlie and the Chocolate Factory, Alice in Wonderland, Dark Shadows, A Tale of Two Cities. Ma sa carriera artìstica de Christopher Lee non si firmat a su tzìnema, essende puru cantante de musical e de Metal, aende collaboradu cun su grupos che Charlemagne e cun s’italianu Rhapsody, registrende carchi trinta discos tra album, sìngulos e colonnas sonoras. Tra custos traballos sunt dignos de mentovare sos chi at fatu in collaboratzione cun sos danesos The Tolkien Ensemble chi at postu in mùsica totu sas poèsias de Su Sennore de sos Aneddos. In custos discos, At Dawn in Rivendell (2003) e Leaving Rivendell (2005), s’atore at interpretadu Barbàrbore e su narradore. Christopher Lee at finas iscritu libros che Tall, Dark and Gruesome e lèghidu unu muntone de audiolibros clàssicos de autores che Christie, Doyle, Hugo e Tolkien cun The Children of Húrin.
Ma Sir Christopher Lee fiat meda de prus de s’atore chi at dadu bida a Saruman in sa pantalla manna, fiat un’amantiosu de s’òpera de Tolkien e si leghiat Su Segnore de sos Aneddos ogni annu dae sa publicatzione e, tra totu sos atores chi ant traballadu a sos tzìnemas est istadu s’ùnicu chi at connotu a Tolkien de persone, comente issu etotu isbeleit, fut in su 1950 pròpiu in su pub The Eagle and the Child, in ue Tolkien e sos àteros professores e iscritores de sos Inklings s’atopaiant a lèghere, bufare e arresonare.
“Fìamus sètzidos arresonende e bufende birra cando calicunu at nadu: “Oh abbà chie est intrende”. Fiat Professor Tolkien, e agiomai non nche ruo dae sa cadrea. No ischia nemmancu chi s’agataret ancora. Fiat un’òmine chi a primu achitu pariat bonu, pipende, un’ inglesu giustu, firmu. E fiat unu gèniu, cun una cultura chi non benit bene a nàrrere. Connòschiat a calucunu de nois (custu, de nois, at nadu “Oh su Professò…” E issu si nd’est acurtziadu. E totus cantos, be’ deo l’apo fatu sa riverèntzia, e ognunu l’at nadu “Comente istat?” e deo “Co… Come… Comente…”
Un’artìculu de su situ vintagenews chi traduimus inoghe nos contat comente Christopher Lee, chi tando aiat 78 annos e cheriat su rolu de Gandalf, mancari ischende de èssere tropu mannu de edade pro cussu, aiat dèpidu currègere a Peter Jackson in contu de sa reatzione a sas istocadas.:
“Girende sos filmis de Su Sennore de sos Aneddos: Sas duas Turres, cando sa cumpangia fiat girende s’iscena ue Grima Limbamala istocat a Saruman a palas, Jackson cheriat a Lee tzichirriende a pustis de retzire s’istocada. No intamen, Lee s’est negadu a tzichirriare, preguntende a su diretore a bìdere si nd’aiat intesu mai òmines tzichirriende a pustis de àere retzidu un’istocada a palas. A bisu de s’atore, sas vìtimas faghiant petzi unu suspiru comente si s’alenu nde li fueret dae purmones. Peter Jackson l’at iscurtadu e at giradu s’iscena sena tzichìrrios. In medas podent preguntare comente est chi Christopher Lee fiat ischidu gasi de orrores de istocadas e mortes. Prima de intrare a su mestieri de atore, Lee fiat unu militare e at gherradu pro sos inglesos in frontes diversos. Cando est iscopiada sa segunda gherra manna, s’est unidu a sa Royal Air Force isperende de traballare a pilota. Làstima però chi sos dutores l’aiant agatadu unu dannu in su nervu de sos ogros e sos superiores ant detzisu chi non fiat in gradu de bolare. Su sònniu de Lee de gherrare in sos chelos pro sos Alliados fiat a bìculos, ma non s’est disisperadu: s’est unidu a sa RAF, cumandende missiones de arriscu mannu in Àfrica Meridionale, Zimbabwe, e Rhodesia prima de intrare in sa Long Range Desert Patrol, s’organizatzione a pustis connota che SAS, sas fortzas ispetziales de s’esèrtzitu inglesu. In su Patrol at gherradu contra a sas fortzas de s’Asse in s’Àfrica de su Nord e in sa liberatzione de sa Sitzìlia. A pustis est intradu in s’élite de Winston Churchill sa Special Operation Executive. A gherra finida, sos guvernos de Inghilterra, Polonia, Czechoslovachia e Yugoslavia ant bantadu meda s’alentu de Lee. Ma issu, in su 1946, at lassadu s’esèrtzitu pro traballare a atore in paris a su fradile Nicolò Carandini, ambassadore italianu in Inghilterra, chi nche l’aiat cumbintu a poi de àere bidu cantu faghiat emotzionare contende sos orrores de sa gherra.”
(dae: vintagenews: https://www.thevintagenews.com/2018/02/09/christopher-lee/ )
S'Arda - Tolkien Sardegna 
Lascia un commento